Simonyanın paylaşımı Moskvada səs-küy yaratdı | "Bunu siz dayandırmasanız..."

“Cəhənnəmin dibindən gələn səslər”.

Bu sözləri Ermənistan Parlamentnin sədri Alen Simonyan feysbukda bölüşdüyü videonun başlığına yazıb. Videoda isə Vladimir Solovyovun canlı yayımdakı çıxışlarından biri yer alıb.

Simonyan digər paylaşımını rus dilində yazıb və Ermənistanda Rusiya telekanallarına qadağa ilə bağlı iyulun 1-i səsləndirdiyi fikirlər barədə rusiyalı həmkarlarının reaksiyasını şərh edib:

“Məgər onlar özlərinə sual vermirlər ki, niyə belə oldu? Rusiya-Ermənistan münasibətlərinin korlanmasında Qərbdə günahkar axtarmaq lazım deyil. Televizora baxmaq kifayətdir. Çünki iki ölkə arasındakı münasibətləri Rusiyanın dövlət telekanalları və burada çalışan jurnalistlər, redaktorlar korlayırlar”.

Simonyanın sözlərinə görə, Rusiya telekanallarındakı bəzi proqramlarda Ermənistanın hazırkı hakimiyyətinə qarşı ana söyüşü də səsləndirilib efirə verilir.

“Moskvadakı həmkarlara bir dəqiqəlik də olsa, özlərini bizim yerimizə qoymağı tövsiyə edirəm. Erməni aparıcılar Rusiya Prezidentini təhqir etsələr, ərazi bütövlüyünü müzakirə edib, “Rusiya mövcud olmamalıdır” desələr, nə edərdiniz? Buna görə də hansısa qərar veriləndə kimə görə yox, nəyə görə sualını verin. Siz bunu dayandırmasanız, biz edəcəyik”, – deyə Simonyan bildirib.