Sirlərlə dolu olan yeraltı möcüzə | İnsanlar hələ də çaşbaş qalıblar ki...

ABŞ-nin Tennessi ştatında yerləşən nəhəng Kreyqhed mağaraları sistemində 13 yaşlı bir oğlan tərəfindən tapılmış yeraltı su hövzəsi artıq Şimali Amerikanın ən böyük yeraltı gölü hesab olunur.

1905-ci ildə Tennessi ştatının Suetvoter və Medisonvill şəhərləri arasında yerləşən mağaralarda oynayan 13 yaşlı Ben Sends hələ araşdırılmamış bir dəlik taparaq oradan sürünüb keçib və həyatının ən böyük kəşfini etmişdi. Onun keçdiyi tunel təxminən velosiped təkəri ölçüsündə və 12 metr uzunluğunda idi. O, sonunda dizədək su olan bir gölə düşmüşdü.

Mağaralarda keramika, bəzək əşyaları, ox ucluqları və digər artefaktlar aşkar edilib. Ən maraqlı hissələrdən biri "Şura otağı" adlanan və girişdən təxminən bir kilometr məsafədə yerləşən geniş bir zaldır. Hazırda bu mağara turistlər üçün açıqdır və hər il təxminən 150 min ziyarətçi qəbul edir.

Gölün səthi hissəsi artıq qismən araşdırılıb: təxminən 243 metr uzunluğa və 67 metr enə malikdir. Amma bu yalnız görünən hissədir. Su altında göl müxtəlif zallara və keçidlərə aparır. Peşəkar dalğıclar tərəfindən indiyədək 5,2 hektardan çox sahə xəritələşdirilib, lakin gölün sonuna hələ də çatmaq mümkün olmayıb. ABŞ hökuməti bu təbii fenomeni milli təbiət abidəsi kimi tanıyıb.