Sirli "cənnət"in sakinləri qədim qayalarda yaşayır, şabalıd unundan çörək hazırlayır

“Oralarda necədir” rubrikasının yeni buraxılışı yayımlanıb.

Bu dəfə Bakıdan 3460 kilometr uzaqlıqda, Aralıq dənizində yerləşən və tarixi eramızdan əvvəl VI əsrə gedib çıxan Korsika adasından bəhs olunub.

Rəsmi olaraq Fransaya məxsus olan Korsikada əhalinin əksəriyyəti özünü fransız deyil, məhz korsikalı hesab edir. Adada məktəblərdə fransız dili ilə yanaşı, korsikan dili də tədris olunur və yerli sakinlər bu dildən gündəlik həyatlarında fəal şəkildə istifadə edirlər.

Adanın Bonifaço şəhərində yerləşən və IX əsrə aid olan daş evlərdə bu gün də insanlar yaşayırlar.

Korsikada əsas kənd təsərrüfatı məhsullarından biri şabalıddır. Burada buğda unu əvəzinə şabalıd unundan çörək, hətta dondurma hazırlanır.

Adada minimum pensiya 900 avro (təxminən 1775 manat), müəllim maaşları isə ayda 1000 avrodan (təxminən 1973 manat) başlayır.

Valideynlər uşaqlarını bağçaya yazdırmaq üçün hamiləliyin ilk aylarından növbəyə dayanmalı olurlar. Bağça üçün saatlıq ödəniş 40 sentdən 4 avroya qədər dəyişir.

Korsikada demək olar ki, hər ailənin qəbiristanlıqda özəl sərdabəsi var. Bu sərdabələr daşınmaz əmlak kimi qiymətləndirilir və onların tikintisi 10-15 min avroya başa gəlir.