Korsikadakı "Nazione" partiyasının liderindən Azərbaycana xüsusi təşəkkür

Türkiyənin “Haber Global” televiziyası Fransanın müstəmləkəsi olan Korsika adasından reportaj hazırlayıb.

Videomaterialda xüsusilə Fransanın müstəmləkəçiliyinə qarşı mübarizəyə toxunulub. Qeyd olunub ki, adada Emmanuel Makron hakimiyyətinə qarşı narazılıq artır, əhali müstəqillik uğrunda ayağa qalxır.

Korsikanın azadlığı uğrunda mübarizə aparan “Nazione” partiyasının üzvü Erik Simoni rəsmi Parisin muxtariyyət təklifinin onlar üçün kifayət etmədiyini söyləyib:

“Onlar xalqımızın mövcudluğunu tanımamaq üçün siyasi təzyiq də daxil olmaqla bütün vasitələrdən istifadə edirlər. Fransa Prezidenti Emmanuel Makron həm ölkəsinin, həm də Avropa İttifaqının ana prinsiplərinə zidd davranır.

E.Makron başqa ölkələrə demokratiya dərsi verməyə çalışır. Amma Korsikanın öz taleyini həll etmək haqqını tanımır. Üstəlik, bu, Aİ-nin tanıdığı haqdır. E.Makronun addımları totalitar yanaşmadır. Bunu qəbul edə bilmərik.

Onun problemləri həll etmək üçün ortaya qoyduğu səylər fəlakətdir və nəyəsə töhfə vermir. Biz beynəlxalq hüququn verdiyi imkanlardan istifadə edirik. Səsimizin eşidilməsinə dəstək olan Azərbaycan kimi ölkələrə təşəkkür edirik”.

Erik Simoni həmçinin mübarizələrinin bundan sonra da davam edəcəyini bildirib.