Siyasətçi məhkəmə binasını yandırmağa cəhd edib

Gürcüstanın “Güclü Gürcüstan-Lelo” koalisiyasının liderlərindən biri Aleksandr Elisaşvili Noyabrın 29-u səhər saatlarında Tbilisi Şəhər Məhkəməsinin dəftərxanasının binasını yandırmağa cəhd edib.

Bu barədə Gürcüstan Daxili İşlər Nazirliyi məlumat yayıb.

İstintaq zamanı müəyyən edilib ki, cari ilin 29 noyabrında səhər tezdən Elisaşvili maskalanmış halda çəkiclə Tbilisi Şəhər Məhkəməsinin dəftərxana binasının xarici fasadındakı şüşəni sındırıb və binaya keçib. O, texniki avadanlıqların və sənədlərin üzərinə benzin tökərək binanı yandırmağa cəhd göstərib.

Hadisə zamanı məhkəmə işçiləri onu zərərsizləşdiriblər.

Bildirilib ki, Elisaşvili əlindəki odlu silahdan istifadə etməklə müqavimət göstərib və icraçılara fiziki təzyiq tətbiq edib.

Toqquşma nəticəsində məhkəmə icraçılarından biri xəsarət alaraq tibb məntəqəsinə yerləşdirilib. Elisaşvili də saxlanılma zamanı müqavimət göstərdiyi üçün xəsarətlər alıb. Polis cinayətin törədilməsi üçün istifadə edilən alətləri maddi sübut kimi götürüb.

Hazırda istintaq Cinayət Məcəlləsinin 19-187-ci maddəsi üzrə aparılır.