Şoyqunun hərbi şirkəti Ukraynada əməliyyata başladı

Rusiya artıq bir aydır yenidən Ukraynanın Xarkov vilayətini ağır silahlardan atəşə tutur, bölgəyə raket zərbələri endirir. Vilayətin ötən il işğaldan azad edilmiş əraziləri 3 gündür yenidən Rusiyanın hücumuna məruz qalıb.

Vilayətin hərbi administrasiya rəhbəri Oleq Snequbov Baku TV-nin Şərqi Avropa bürosuna müsahibəsində şəhərin müxtəlif növ raketlərdən atəşə tutulduğunu bildirib.

Onun sözlərinə görə, təkcə Xarkovda 30 mindən artıq tikili məhv edilib, 500 mindən çox insan məcburi köçkünə çevrilib.

Hərbi ekspert Taras Berezovets isə qeyd edib ki, hazırda ən çox Kupyansk istiqaməti atəşə tutulur və burada Rusiyanın əsas məqsədi Oskol çayının digər tərəfində yerləşən Ukrayna hərbi birləşmələri ilə digər bölmələr arasında əlaqəni kəsmək, həmçinin Kupyansk-Uzlovaya dəmir yolu xəttinə çıxmaqdır.

“Bu dəmir yolu Rusiyadan işğal altındakı Luqansk vilayətinə tədarüklərdə mühüm rol oynayır. Bundan başqa, düşmən bu istiqamətə elit hava-desant qüvvələrini göndərir. Rusiya ümid edir ki, bununla Ukrayna Silahlı Qüvvələrinin diqqətini Baxmut, Melitopol və Berdyansk istiqamətlərində həyata keçirdiyi hücum əməliyyatlarından yayındıra biləcək.

Kupyansk istiqamətində məhbuslardan ibarət olan “Ştorm Z” bölmələrindən fəal şəkildə istifadə olunur. “Ştorm Z” xüsusi hərbi şirkəti Rusiyanın müdafiə naziri Sergey Şoyqu tərəfindən təsis edilib. “Vaqner”dən fərqli olaraq bu hərbi şirkətin döyüşçülərinin hazırlıq, silahlanma səviyyəsi dəfələrlə pisdir”, – deyə o əlavə edib.