Strateji obyektlər, zavod və neft emalı müəssisələri vuruldu

Son sutka ərzində Rusiyanın Ukraynanın Xarkov, Zaporojye və Sumı vilayətlərinə endirdiyi zərbələr nəticəsində üç nəfər həlak olub, 26 nəfər yaralanıb.

Bu barədə vilayət hərbi administrasiyalarının rəhbərləri və hüquq-mühafizə orqanları məlumat veriblər.

Xarkov Vilayət Hərbi Administrasiyasının rəhbəri Oleq Sinequbov bildirib ki, Rusiya qoşunları Xarkova və regionun 26 yaşayış məntəqəsinə zərbələr endirib. Hücumlar nəticəsində bir nəfər həlak olub, 15 nəfər, o cümlədən bir uşaq xəsarət alıb.

Zaporojye Vilayət Hərbi Administrasiyasının rəhbəri İvan Fyodorovun sözlərinə görə, sutka ərzində Rusiya qoşunları regionun 46 yaşayış məntəqəsinə 817 zərbə endirib. Kütləvi hücumlar nəticəsində 10 nəfər yaralanıb.

Ukrayna Milli Polisinin məlumatına görə, Sumı vilayətinin atəşə tutulması nəticəsində isə iki nəfər həlak olub, bir qadın yaralanıb.

Ukrayna isə Rusiyanın Çeboksarı və Samara şəhərlərinə raket hücumu edib. Hücumdan sonra Çeboksarıda hərbi zavod və Samarada neft emalı zavodunda yanğın baş verib. Çuvaşiya hakimiyyəti üç nəfərin yaralandığını açıqlayıb.

Çuvaşiya Respublikasının rəhbəri Oleq Nikolaev bildirib ki, yaralananlardan ikisi orta dərəcəli, digəri isə yüngül xəsarətlər alıb, artıq onlardan biri evə buraxılıb.