Su qiymətinə evlər | Bu kəndin sakinləri Trampın prezident seçilməsini fürsətə çevirdi

Dünyanın bir çox ölkəsi Donald Trampın yenidən ABŞ prezidenti seçilməsi ilə bağlı nə edəcəyini düşünərkən, İtaliyanın Sardiniya adasındakı bir kənd potensial fürsətdən istifadə edib.

İtaliyanın bir çox digər kənd əraziləri kimi, Ollolai onilliklər boyu davam edən sosial-iqtisadi tənəzzüldən sonra yaşayış şərtlərini canlandırmaq naminə maraqlı kampaniyaya start verib.

Burada demoqrafik vəziyyəti yaxşılaşdırmaq üçün amerikalılara cəmi 1 dollara ev sahibi olmaq imkanı təklif edilir.

Qeyd edək ki, ABŞ-də keçirilən son prezident seçkilərindən sonra bir çox amerikalının ölkəni tərk edəcəyi ilə bağlı açıqlamaları Ollolai rəsmilərini bu addımı atmağa sövq edib.

Xatırladaq ki, Ollolainin əhalisi keçən əsrdə 2250-dən 1100-ə düşüb, hər il cəmi bir neçə körpə doğulur. İqtisadi çətinliklər üzündən bir çox ailə kəndi tərk edib.