Sui-qəsd cəhdlərində qalmaqallı detal | Gürcüstanda inqilab bu cür planlaşdırılır?

Gürcüstan xüsusi xidmət orqanları “Gürcü Arzusu – Demokratik Gürcüstan” Partiyasının qurucusu və hazırkı hakimiyyətin faktiki lideri olan Bidzina İvanişviliyə qarşı sui-qəsd cəhdi ilə bağlı araşdırma aparır.

Sui-qəsdin necə və hansı şəraitdə baş verəcəyi, ya da bu hadisəni kimlərin təşkil etdiyi barədə heç bir dəqiq məlumat verilməyib. Yalnız o məlumdur ki, İvanişvilini hazırda Ukraynada yaşayan keçmiş dövlət məmurları və güc strukturlarının nümayəndələri öldürmək istəyiblər.

Gürcüstanda Dövlət Təhlükəsizlik Xidmətinin məlumatında bu barədə açıqlamasında Ukrayna ilə bağlı məsələnin qeyd olunması onu deməyə əsas verir ki, rəsmi Tbilisi milyarderə qarşı təşkil edilən sui-qəsdə görə konkret ünvan göstərərək ad çəkməsə də, Qərbi ittiham edir.

Xüsusilə son günlər gürcü mediası bu hadisəni son 2 ayda ard-arda sui-qəsdə məruz qalan Slovakiyanın Baş naziri Robert Fitso və yenidən Ağ Ev rəhbərliyinə iddia edən keçmiş prezident Donald Trampın başına gəlmiş olaylarla səsləşdirir.

Hər 3 siyasətçini birləşdirən bir cəhət var. Hər ikisinin son dövrlər ABŞ dərin dövləti ilə münasibətləri pisləşib və onlar Rusiya ilə münasibətləri isti tutmağın tərəfdarıdırlar.

Gürcüstanda qəbul edilən “Xarici agentlər” haqqında qanundan sonra Qərbin Tbilisiyə münasibəti məlumdur. Hadisələrin Gürcüstanda parlament seçkilərinə az qalmış baş verməsi isə siyasi vəziyyəti daha da kəskinləşdirir.