Suriyada getdikcə böyüyən risklər | Böyük dövlətlərin maraqlarına xidmət edən radikal qruplar

Yaxın Şərqin ən qaynar nöqtəsi olan Suriyada yaşananlar mahiyyətcə mürəkkəbdir.

Bu ölkədə ixtilaflar çox dərinlərə işləyib. Burada iqtidar-müxalifət, sünni-şiə, böyük dövlətlərin maraqlarına xidmət edən bir neçə radikal qrupun qarşıdurması özünə ciddi yer edib.

Üstəlik, regionda maraqları olan qüvvələrin öz istəklərini diqtə etməyə çalışması Suriyada sabitliyin bərqərar olunması yolunda ciddi maneə hesab olunur.

Əslində bu ölkədəki böhranın aradan qaldırılmasını nəzərdə tutan Astana və Cenevrə platformaları çərçivəsində siyasi həll təşəbbüsləri var idi. Bu təşəbbüslərin davamı olaraq 2022-ci ilin sonunda Ankara ilə Dəməşq arasında dialoq başladılıb.

Rəcəb Tayyib Ərdoğan o zaman Bəşər Əsəd rejimi ilə terrorla mübarizədə əməkdaşlığa ümid edirdi. Lakin Bəşər Əsəd hökuməti siyasi və təhlükəsizlik problemləri həll edildikdən sonra Türkiyənin Suriyadakı hərbi varlığını geri çəkməsi təklifini irəli sürüb.

Üstəlik, Türkiyə Tel Rıfat bölgəsinin terror təşkilatı PKK/YPG-dən təmizlənməsini istəyirdi. Lakin bu cəhd də uğursuz olub.

Bu səbəbdən Türkiyə bölgədə mövcudluğunu dəstəklədiyi qruplar hesabına qoruyub saxlamağa başlayıb. Suriya Milli Ordusunun bölgədə mövcudluğu Ankara üçün hava-su kimi lazımdır.

Bəs Bəşər Əsəd hakimiyyəti devrildikdən sonra bu qruplaşma hansı fəaliyyətlə məşğuldur?