Qəzza ilə bağlı danışıqlarda mühüm irəliləyiş | Bu tarixə qədər...

İsrailin nümayəndə heyəti Dohadadır və Qətər vasitəçiləri ilə Qəzza zolağında münaqişənin həlli üçün HƏMAS hərəkatı ilə razılaşmanın şərtlərini müzakirə edir.

Bu barədə xarici KİV məlumat yayıb.

Bildirilib ki, İsrail nümayəndə heyəti Qəzza zolağında atəşkəs rejiminin tətbiqi və anklavda saxlanılan girovların azad edilməsinə dair sazişin qalan detallarını müzakirə etmək üçün Qətər vasitəçiləri ilə danışıqlar aparır.

Tərəflər mayın 31-də ABŞ Prezidenti Co Baydenin şərtlərini irəli sürdüyü Qəzza razılaşması ilə bağlı İsrail və HƏMAS arasındakı fikir ayrılıqlarını aradan qaldırmağa çalışır.

Əlavə olunub ki, HƏMAS-la İsrail arasında girovların azad edilməsi ilə bağlı razılığın əldə olunması dekabrın sonuna qədər baş tuta bilər. Qəzza ilə əlaqədar yekun razılaşma istiqamətində mühüm irəliləyişin olduğu bildirilib.

Məlumata görə, sövdələşmədə iki əsas məsələ həll olunmağa yaxındır və ayın sonunadək birinci mərhələ üzrə razılığın əldə olunması gözlənilir. İsrail və Misir rəsmilərinin yaxın günlərdə qalan məsələləri müzakirə etmək üçün yekun görüş keçirmək niyyətində olduqları bildirilir.