Taliban dünyadan yardım diləyir: 13 əfqan kəndi yer üzündən silindi

Əfqanıstanın qərbində və qonşu əyalətlərdə baş verən zəlzələ nəticəsində ölənlərin sayı durmadan artır.

Yeraltı təkanlar 2 445 nəfərin həyatına son qoyub. Bu barədə yerli hakimiyyət orqanlarına istinadən Çinin “Sinxua” agentliyi məlumat yayıb. “Ən çox zərər çəkmiş ərazi olan Heratda 13 kənd tamamilə məhv olub”, – deyə Əyalətin Təbii Fəlakətlərlə Mübarizə İdarəsinin direktoru Mavlavi Aşari açıqlamasında bildirib.

Qeyd edək ki, bir sıra dünya ölkələri Əfqanıstanda baş verən dağıdıcı zəlzələnin nəticələri ilə mübarizə məqsədilə humanitar yardım ayırıb. Türkiyənin Milli Müdafiə Nazirliyi bildirib ki, lazım olan ləvazimatlar, həmçinin Təbii Fəlakət və Fövqəladə Hallar Agentliyinin təminatları təyyarələrlə Əfqanıstana göndərilib. Eyni zamanda Çinin Qızıl Xaç Cəmiyyəti Əfqanıstana yardım üçün 200 min ABŞ dolları məbləğində humanitar yardım ayırıb.

Qurumdan verilən məlumata görə, bu vəsait Əfqanıstan Qızıl Aypara Cəmiyyətinə köçürüləcək. Yardımın axtarış-xilasetmə işlərini maliyyələşdirmək üçün istifadə olunması planlaşdırılır.