“Taliban”dan radikal qərar: müəllimlərin saqqalını qırxması məktəbləri bağlatdırdı

İki il öncə Əfqanıstanda hakimiyyəti yenidən ələ keçirmiş radikal “Taliban” hərəkatının tərəfdarları Qəzni əyalətində iki özəl məktəbi bağlayıb.

Xarici media xəbər verir ki, buna məktəbdə dərs deyən müəllimlərin saqqallarını qırxması səbəb olub.

“Hasht-e Subh” qəzeti yazır ki, təhsil müəssisələrinin işinin bağlanması qərarının digər səbəbi müəllimlərin hicab geyinmə normalarına əməl etməməsi ola bilər. Oktyabrın 2-də Əmr və Səhv Qadağalar Nazirliyinin yerli bölmələrinin qərarı ilə məktəblər bağlanıb.

Bundan əlavə, “Taliban” tərəfdarları dərslərdə qızların iştirak etdiyinə görə Qəznidə daha iki uşaq təhsil mərkəzini bağlayıblar. Bu məktəblərdə hər iki cinsdən olan uşaqlar üçün təhsil “Taliban”ın tələblərinə uyğun həyata keçirilsə də, bu radikal dini təşkilat buna qane olmayıb.

“Taliban”ın Əfqanıstanda hakimiyyəti ikinci dəfə ələ keçirməsindən sonra bəzi fikirlər var idi ki, sözügedən hərəkatda müəyyən yumşalmalar var. Hətta ilk vaxtlar bunun elementləri də hiss olunurdu. Son hadisələr isə gözləntilərin özünü doğrultmadığını ortaya qoyur.