Tbilisidə baş verən silahlı insidentin detalları açıqlandı

Gürcüstanın paytaxtı Tbilisi şəhərində “Holiday Inn” hotelində silahlı insident baş verib.

Bu ölkənin kütləvi informasiya vasitələrinin yaydığı məlumata görə, hotelin müştərilərindən biri atəş açmağa başlayıb, bu azmış kimi bir nəfəri də girov götürüb. Ölən və xəsarətalanlar barədə məlumat verilməyib.

Polis hotelə daxil olaraq cinayəti törədən şəxsi tutub. “Təhlükə” və “qanunsuz silah daşıma” maddələri ilə cinayət işi açılıb.

Bu barədə Tbilisi polisinin rəisi Vaja Siradze məlumat verib.

Qeyd edək ki, atəş səsləri günorta saatlarında eşidilib. Daxili İşlər Nazirliyinin əməkdaşları dərhal reaksiya verərək insidentin böyüməsinə imkan verməyiblər. Atəş açan şəxsin qaldığı nömrədə axtarış aparılıb və cinayətkar tutulub.

Saxlanılma zamanı odlu silahın aşkarlanıb-aşkarlanmadığı barədə xəbər yoxdur. Bircə o informasiya açıqlanıb ki, saxlanılma zamanı atəş açan şəxs qaldığı hoteldə tək olub. Yəni polislər girov qismində heç kəsə rast gəlməyiblər.

Faktla bağlı araşdırma aparılır.