Tbilisidə izdihamlı mitinq keçirildi | Gürcüstanın gələcəyi Avropadır

Tbilisidə Gürcüstanın Avropa İttifaqına üzvlüyə namizəd statusu alması ilə bağlı izdihamlı mitinq keçirilib.

Azadlıq meydanında keçirilən aksiyada Prezident Salome Zurabişvili, Baş nazir İrakli Qaribaşvili, dövlət və hökumət üzvləri, ictimaiyyət nümayəndələri, eləcə də Gürcüstanın müxtəlif bölgələrindən gələn minlərlə insan iştirak edib.

Tədbirdə Gürcüstanın və Avropa İttifaqının himnləri səsləndirilib. Baş nazir İrakli Qaribaşvili Gürcüstanın Avropa İttifaqına üzvlüklə bağlı namizəd statusunu almasını ölkəsinin diplomatik qələbəsi adlandırıb və bu münasibətlə əhalini təbrik edib.

Politoloq Marina İzoria isə namizəd statusu almağın Gürcüstanın məqsədinə çatdığı mənasına gəlmədiyini deyir: “Bu gün Gürcüstan üçün çox böyük və önəmli gündür. Nəhayət ki, namizəd statusunu aldıq. Bu baxımdan bu işdə zəhməti olan hər kəsi təbrik edirəm. Ancaq namizəd statusunu almış olmağımız məqsədimizə çatdığımız mənasına gəlmir. Görüləsi çox işimiz var və çox zəhmət çəkməliyik ki, Gürcüstan böyük Avropa ailəsinin üzvü olsun və öz tarixi köklərinə qovuşsun”.

Qeyd edək ki, dekabrın 14-də Avropa İttifaqı Şurası Gürcüstana namizəd ölkə statusu verib.