Təhdidlər Almaniyanı da hərəkətə keçirdi | Qərar verildi ki...

Bundestaqın (Almaniya parlamenti) Müdafiə Komitəsinin rəhbəri Tomas Rövekamp ölkədə məcburi hərbi xidmətin bərpası ilə bağlı qərarın 2027-ci ilin yayından gec olmayaraq qəbul edilməli olduğunu bildirib.

O, Bundesverin (Almaniya Silahlı Qüvvələri) şəxsi heyəti üçün məcburi illik hədəflərin müəyyən edilməsi məsələsini də müdafiə edib.

“2027-ci ilin yayından gec olmayaraq hərbi xidmətə çağırışın qaytarılması ilə bağlı qərar verməliyik və bu qərar üçün ümumi meyarlar müəyyən etməliyik. Haaqa sammitində Almaniya NATO-ya iddialı hərbi imkanlara söz verib ki, bu da ehtiyatda olan əsgərlərin sayını 250 faiz artırmaqla yanaşı, qoşunların sayının da 50 faiz artırılmasını tələb edir.

Son günlər Rusiya tərəfindən NATO hava məkanında, eləcə də Almaniyanın hərbi və mülki infrastrukturuna qarşı təhdidlər baş verir, müdafiə qabiliyyətimizi gücləndirməklə vaxt itirə bilmərik. Buna görə də şəxsi heyətin artırılması, xüsusən də aktiv qoşunlar üçün illik məcburi hədəflərə ehtiyacımız var”, ‒ T.Rövekamp deyib.

Almaniyada məcburi hərbi xidmətin bərpası təklifini müdafiə naziri Boris Pistorius da müdafiə edib. Almaniya Müdafiə Nazirliyi Bundesverin aktiv şəxsi heyətinin sayını 260 000-ə, ehtiyat qüvvələri 200 000-ə çatdırmağı hədəfləyir.

Avqustun 27-də Almaniya hökuməti Pistoriusun yeni hərbi xidmət modeli haqqında qanun layihəsini qəbul edib.

Almaniyada məcburi hərbi çağırış 2011-ci ilin iyulunda ləğv olunub, bundan sonra peşəkar orduya keçid baş tutub.