Tramp Çinə səfər edəcək?

Vaşinqton və Pekin arasında ticarət münaqişəsi fonunda ABŞ Çinə təyyarə ehtiyat hissələrinin tədarükünü dayandıra bilər.

“Onlar bizi nadir torpaq elementləri ilə hədələdilər. Mən də onları rüsumlarla hədələdim. Amma mən onları təyyarələr kimi bir çox başqa şeylərlə də təhdid edə bilərdim. Çünki onlar öz təyyarələri üçün hissələri ala bilmirlər. Biz onların təyyarələrini düzəldirik. Bunlar əsasən “Boeing” təyyarələridir və biz onlara ehtiyat hissələrini tədarük etməyi dayandıra bilərik”, ‒ deyə Tramp Ağ Evdə Avstraliyanın Baş naziri Entoni Albaneze ilə görüşünün əvvəlində jurnalistlərə açıqlamasında bildirib.

ABŞ Prezidenti Koreya Respublikasında keçiriləcək Asiya-Sakit Okean İqtisadi Əməkdaşlıq Təşkilatının sammitində Çin lideri Si Cinpinlə görüşündə ədalətli ticarət sövdələşməsi əldə edəcəklərinə ümid etdiyini açıqlayıb.

Tramp qeyd edib ki, ABŞ daha əvvəl Avropa İttifaqı və Yaponiya ilə əlverişli ticarət sazişləri üzrə danışıqlar aparıb.

“Cənubi Koreya ilə də çox ədalətli razılaşma əldə etdik. İndi isə gözləyirəm ki, sədr Si Cinpin ilə görüşüb çox ədalətli razılaşma əldə edək”, ‒ deyə Amerika lideri bildirib.