Tramp elə bir şəxsi vəzifəyə gətirir ki... | ABŞ-də nələr baş verəcək?

ABŞ-nin yeni seçilən prezidenti Donald Tramp Baş prokurorun müavini vəzifəsinə vəkili Todd Blanşın namizədliyini irəli sürə bilər.

Bu barədə CNN məlumat yayıb.

Bildirək ki, hazırda Baş prokurorun müavini vəzifəsini Liza Monako tutur. Bu, ABŞ Ədliyyə Nazirliyində ikinci ən mühüm mövqedir.

Tramp həmçinin Florida ştatından senator Marko Rubionun dövlət katibi vəzifəsinə namizədliyi barədə qərarını açıqlayıb.

“Marko xalqımızın güclü müdafiəçisi, müttəfiqlərimizə sadiq dost və rəqiblərimizə heç vaxt boyun əyməyən qorxmaz döyüşçü olacaq”, – deyə məlumatda qeyd olunub.

Qeyd edək ki, Rubio Trampın Ukrayna ilə bağlı ümumi mövqeyini dəstəkləyir. O, 2024-cü ilin aprelində Ukraynaya qəbul edilən 61 milyard dollarlıq hərbi yardım paketinin əleyhinə Senatda səs verən 15 respublikaçı arasında olub.

ABŞ-nin yeni seçilən prezidenti ədliyyə naziri və Baş prokuror vəzifələrinə isə konqresmen Mett Getsin namizədliyini irəli sürüb. Bundan əvvəl məlum olub ki, Tramp Pentaqonun rəhbəri postuna amerikalı teleaparıcı və keçmiş hərbçi Pit Heqseti təklif edib.

Nümayəndələr Palatasının keçmiş üzvü Tulsi Qabbardın namizədliyi isə ABŞ Milli Kəşfiyyatının direktoru vəzifəsinə irəli sürülüb. Qabbard ABŞ-nin Ukrayna və Rusiyaya qarşı xarici siyasətini tənqid etməsi ilə tanınır.

Vurğulayaq ki, ABŞ Senatı Donald Trampın irəli sürdüyü namizədləri ən qısa zamanda təsdiq etməyi planlaşdırır.