Tramp İrana buna görə 2 həftə vaxt vermişdi | Nüvə obyektlərinə hücumun pərdəarxası

ABŞ Prezidenti Donald Tramp və türkiyəli həmkarı Rəcəb Tayyib Ərdoğan İsraillə İran arasında artan gərginlik fonunda İstanbulda gizli görüş təşkil etməyə çalışıb.

Sui-qəsd və təhdidlər fonunda gizlənən İranın ali lideri isə bu görüşə heç bir reaksiya vermədiyi üçün bu baş tutmayıb.

“Aksios”un məlumatına görə, D.Tramp İran rəsmiləri ilə birbaşa özü görüşmək istəyib. Hətta hücum baş tutmaması şərti ilə nüvə sazişi imzalamağı belə gözə alıb.

İsrail-İran münaqişəsi isə artıq 10-cu gününə qədəm qoyub. D.Trampla R.T.Ərdoğanın İranla danışıqlara cəhdi isə uğursuz olub.

Türkiyə rəsmiləri görüşlə bağlı informasiyanı İran Prezidenti Məsud Pezeşkiana çatdırsa da, ali lider Ayətullah Əli Xamenei ilə əlaqə mümkün olmayıb. Beləliklə, görüş baş tutmayıb.

Hücumdan əvvəl ABŞ lideri Tehrana “sizə 2 həftə vaxt verirəm” deyə sosial şəbəkə hesabında yazıb. Lakin bir qədər sonra D.Tramp Seyid Əli Xamenei ilə bağlı yenidən paylaşım edib.

“İran bizim onlardan tələb etdiyimiz sənədi imzalamalı idi”, – deyə Ağ Ev lideri yazıb.

Daha sonra isə ABŞ Hərbi Hava Qüvvələrinin İranın üç nüvə obyektini bombalamasına dair informasiya yayılıb. Vaşinqton hücumdan sonra quru əməliyyatı keçirməyəcəyini bildirsə də, regionda narahatlıqlar artmağa davam edir.