Tramp Madurodan sonra Venesuela ilə bağlı planlarını açıqladı - Baku TV

Amerika Birləşmiş Ştatları Venesuelanı idarə edəcək və “uzun illər” onun neftini çıxaracaq.

Bu barədə ABŞ Prezidenti Donald Tramp “The New York Times” qəzetinə müsahibəsində bildirib.

Onun sözlərinə görə, həbsdə olan Nikolas Maduronun tərəfdarlarından ibarət olan Venesuelanın müvəqqəti hökuməti ABŞ-nin zəruri hesab etdiyi hər şeyi verir. Lakin D.Tramp Vaşinqtonun Cənubi Amerika ölkəsinə nə vaxta qədər nəzarət edəcəyini açıqlamayıb.

“Bunu yalnız zaman göstərəcək”, – deyə o bildirib.

Bununla belə, ABŞ lideri bu prosesin bir ildən daha çox çəkə biləcəyini söyləyib.

Prezident vurğulayıb ki, ABŞ Administrasiyası Venesuelanı çox faydalı şəkildə bərpa etməyi nəzərdə tutur.

“Biz neftdən istifadə edəcəyik və nefti götürəcəyik. Neftin qiymətini aşağı salacağıq və Venesuelaya pul verəcəyik. Çünki ölkənin buna ehtiyacı var”, – deyə D.Tramp bəyan edib.

O, Venesuelanın neft sektorunun bərpasının illər tələb edəcəyini etiraf edib.

Ağ Ev lideri bildirib ki, N.Maduro rejiminin devrilməsi regiondakı digər liderləri qorxudub və onları ABŞ-yə tabe olmağa məcbur edib.

D.Tramp gələcəkdə təhlükəsiz olacağı təqdirdə Venesuelaya səfər etmək istədiyini də açıqlayıb.