Tramp niyə Putinin tərəfindədir? - ABŞ-nin xarici siyasətində tarixi dönüş

“ABŞ Prezidenti Donald Trampın rusiyalı həmkarı Vladimir Putinə sədaqəti uzun tarixə malikdir”.

Bunu “The Washington Post” nəşrinin analitiki Maks But bildirib.

M.But qeyd edib ki, artıq D.Trampın ikinci prezidentliyi müddətində o, Kremlə haqq qazandırmaq mövqeyini bölüşən başqa adamları vəzifəyə təyin edib:

“Dövlət katibi Marko Rubio bir dəfə V.Putini “qanqster” və “quldur” adlandırmışdı. Bu yaxınlarda Səudiyyə Ərəbistanında Rusiya rəsmiləri ilə görüşdükdən sonra o, “ruslarla tərəfdaşlıq üçün mövcud olan inanılmaz imkanları” yüksək qiymətləndirdi”.

Onun sözlərinə görə, D.Tramp indi öz siyasəti ilə ABŞ-nin xarici siyasət tarixində yəqin ki, ən təsirli dönüşü edir:

“D.Tramp elə davranır ki, sanki sülhə əsas maneə V.Putin deyil, V.Zelenskidir, baxmayaraq ki, V.Putin sadəcə olaraq Ukrayna ərazisindən qoşunlarını çıxarmaqla müharibəni hər an bitirə bilər. D.Tramp açıq şəkildə V.Putinin müharibəyə son qoymaq istədiyini söylədi və hətta onu lazım olduğundan daha səxavətli olduğuna görə təriflədi”.

M.But vurğulayıb ki, V.Zelenski ölkəsinin sülhə can atdığını açıq şəkildə ifadə edib, lakin istənilən razılaşma Rusiyanın gələcək hücumunun qarşısını almaq üçün təhlükəsizlik təminatlarını ehtiva etməlidir.