Tramp Pekinin Tehrana göstərdiyi dəstək məsələsinə münasibət bildirdi - Baku TV

ABŞ Prezidenti Donald Tramp bildirib ki, Amerika tərəfi İranla danışıqlar zamanı onun ərazisindən nüvə yanacağının və digər radioaktiv materialların çıxarılmasını müzakirə edir.

Bu barədə o, "Fox News" telekanalına müsahibəsində danışıb.

"Məsələ burasındadır ki, mənim "nüvə tozu" adlandırdığım şeyi götürməyimiz lazımdır, başa düşürsünüz? Ancaq biz bu "nüvə tozu"nu götürməliyik. Biz bunu etməyə hazırlaşırıq və bu, İranla danışıqlarımızın bir hissəsidir. Biz onun onlarda qalmasını istəmirik", – deyə o bildirib.

ABŞ Prezidenti qeyd edib ki, o, 2025-ci ilin iyununda İranın atom sənayesi obyektlərinə endirilən zərbələr zamanı, demək olar, tamamilə məhv edilmiş digər materialları "nüvə tozu" adlandırır.

Tramp həmçinin Çinin İrana müəyyən dəstək göstərdiyini ehtimal etdiyini bildirib. Onun sözlərinə görə, Pekin daha geniş dəstək verə bilərdi, lakin hazırkı vəziyyət onu ciddi şəkildə narahat etmir.

Çinin Xarici İşlər Nazirliyi isə bu iddiaları rədd edərək hərbi yardımla bağlı ittihamları qəbul etməyib.