Tramp Putindən üz döndərir? | "Ankoric razılaşmaları"na yenidən baxıla bilər - Baku TV

ABŞ Prezidenti Donald Tramp “Böyük yeddilik” sammiti çərçivəsində Rusiya lideri Vladimir Putindən məyus olduğunu bildirib və ölkəsinin istənilən sövdələşmə zamanı Rusiyanın Ukraynanın Donbas bölgəsinə nəzarət etmək tələbini qəbul etdiyi “Ankoric razılaşmaları”na yenidən baxılması ehtimalını istisna etməyib.

Bu barədə “Axios” nəşri xəbər verib.

Məlumata görə, sammit çərçivəsində Ukrayna Prezidenti Volodimir Zelenski ilə görüşən və bundan əvvəl Rusiya Prezidenti ilə söhbət edən Amerika lideri Moskvaya təzyiq göstərilməsinin zəruriliyindən danışıb.

“Tramp Putinlə bağlı hər şeyə skeptik yanaşırdı. Rusiyaya təzyiq barədə danışırdı. Lakin digər liderlər onun həqiqətən nəsə bir addım atacağına inanmırlar”, – deyə “Axios” nəşri yazıb.

ABŞ-nin Rusiya tərəfinin Ukraynanın Şərq regionları üzərində nəzarət qurması şərtini qəbul etməsi barədə bəyanatlarına baxmayaraq, iyunun 25-də Dövlət katibi Marko Rubio Tramp və Putinin Alyaskadakı görüşündə Rusiya-Ukrayna münaqişəsinin nizamlanması üzrə heç bir konkret razılaşmanın əldə olunmadığını bildirib.

O həmçinin ABŞ-nin Ukrayna ətrafındakı vəziyyətin nizamlanması prosesində fəal addımlar atmaq və konstruktiv mövqe tutmaq niyyətini təsdiqləyib.