Tramp savaşa qoşulmağı seçdi? - İranın nüvə obyekti bu silahla vurulacaq?

İran və İsrailin bir-birini bombaladığı məqamda bütün gözlər ABŞ-yə dikilib. Hər kəs bilmək istəyir ki, ABŞ bu müharibəyə müdaxilə edəcək, ya yox? İsrail bəyan edir ki, onun əsas hədəflərindən biri İranın nüvə potensialını ləğv etməkdir.

İranın ən möhkəm qorunan nüvə obyekti “Fordo” zavodudur. O, yerin altında, dərinlikdə yerləşir. Hələlik peyk görüntülərinə baxanda obyektin zədələndiyini görmürük. Amma İran deyir ki, İsrail zavodu sıradan çıxarıb.

İsrailin ABŞ-dəki səfiri bəyan edib ki, bütün bu əməliyyat “Fordo” zavodunun məhvi ilə yekunlaşmalıdır. Bu zavodu isə məhv edəcək bircə silah var və məlum olduğu qədər o silah yalnızca ABŞ-də var.

Bu, GBU-57 bunker əleyhinə bombadır, yerin alt dərinliklərində hədəfləri məhv etmək üçün istifadə olunur. O, havadan atılır və yerin altına mismar kimi daxil olur.

İddialara görə, o, partlamadan əvvəl 60 metrlik beton baryeri deşmə gücünə malikdir. Məhz buna görə də ABŞ-nin İsrailə kömək etmək üçün bu konfliktə müdaxilə edib-etməyəcəyi vacibdir.