Tramp son hücumlardan sonra dünyaya səsləndi | İndi sülh zamanıdır!

ABŞ Prezidenti Donald Tramp dünyanı sülh münasibətilə təbrik edib və o, “Truth” hesabı vasitəsilə müvafiq paylaşım edib.

“Təbriklər, Dünya! İndi sülh zamanıdır!”, ‒ deyə Tramp yazıb.

Donald Tramp öncəki paylaşımında planlaşdırılan hücum barədə vaxtında xəbərdarlıq etdiyinə görə İrana təşəkkür edib.

O, ABŞ Hərbi Hava Qüvvələrinin Fordo, Nətənz və İsfahandakı nüvə obyektlərinə zərbələrindən sonra İranın cavab hücumunu “zəif” adlandırıb.

“14 raket atılıb – 13-ü vurulub, biri isə təhlükəsiz istiqamətdə hərəkət etdiyi üçün buraxılıb. Məmnuniyyətlə bildirirəm ki, amerikalılardan heç kim yaralanmayıb və demək olar ki, heç bir ziyan dəyməyib. İrana əvvəlcədən xəbərdarlıq etdiyinə görə təşəkkürümü bildirmək istəyirəm, bunun sayəsində heç kim ölməyib və xəsarət almayıb”, – deyə Tramp qeyd edib.

Ağ Ev rəhbəri eyni zamanda İranın regionda sülh və təhlükəsizliyin bərqərar olunması istiqamətində ortaq fikrə gələcəyinə inandığını bildirib və İsraili də eyni yanaşma nümayiş etdirməyə çağırıb.