Tramp Ukrayna ilə bağlı konkret şərtlər qoydu | Müharibənin sonu yaxınlaşır?

"ABŞ Prezidenti ilə Aİ liderləri arasında videokonfrans zamanı tərəflər Ukrayna böhranı mövzusunda koordinasiyanı davam etdirmək barədə razılığa gəliblər".

Bunu Avropa Komissiyasının sədri Ursula fon der Lyayen "X" sosial şəbəkəsində yazıb.

"Donald Tramp, Avropa liderləri və Volodimir Zelenski ilə çox səmərəli söhbət etdik. Biz Rusiya və ABŞ arasında Alyaskada keçiriləcək ikitərəfli sammitlə bağlı fikir mübadiləsi apardıq, koordinasiyanı davam etdirməyə razılaşdıq", ‒ deyə o yazıb.

Avropa İttifaqı Şurasının sədri Antoniu Koşta isə Donald Trampın həmsöhbətlərinə çatdırdığı üç əsas bəndi qeyd edib.

"Prezident Tramp bizimlə çox vacib üç məqsəd bölüşdü. Birincisi, atəşkəsdir. İkincisi, Ukraynadan başqa heç kim Ukrayna məsələləri üzrə danışıqlar apara bilməz və üçüncüsü isə ədalətli sülh əldə edildikdə ABŞ-nin Avropa ilə təhlükəsizlik şərtlərinin gücləndirilməsi səylərini bölüşməyə hazır olmasıdır”, ‒ deyə Koşta bildirib.

Qeyd edək ki, Koşta və Makron Fransa Prezidentinin iqamətgahlarından birində ABŞ və Avropa liderləri ilə danışıqlarda birgə iştirak etmək üçün görüşüblər.