Tramp və Putin arasında "torpaq söhbəti" | Savaşın sonu yaxınlaşır, yoxsa...?

“Reuters” yazır ki, Alyaskada keçirilən sammitdə Rusiya Prezidenti Vladimir Putin və ABŞ Prezidenti Donald Tramp Ukrayna ilə bağlı sülh planını müzakirə ediblər.

Mənbələrin məlumatına görə, Rusiya işğal etdiyi bəzi kiçik ərazilərdən imtina etməyə hazırdır, əvəzində Kiyev Donetsk və Luqanskdan tamamilə geri çəkilməlidir.

Razılaşmaya əsasən, Moskva Xerson və Zaporojyedə cəbhə xəttini dondurmağı qəbul edə bilər, lakin Krım üzərində suverenliyinin tanınmasını da tələb edir. Rusiya həmçinin Ukraynada rus dilinin rəsmi status almasını və Pravoslav Kilsəsinin sərbəst fəaliyyətini istəyir.

Tramp isə Avropa liderləri ilə danışıqlarda Ukraynaya NATO üzvlüyü olmadan “Maddə 5”ə bənzər təhlükəsizlik zəmanətləri mövzusunu gündəmə gətirib. Lakin Kiyev Donetskdən geri çəkilməyi qəti şəkildə rədd edib və bu bölgəni həyati müdafiə xətti adlandırıb.