Tramp və Zelenski arasındakı buzlar əridi? | "Dedim ki, özünüzü yaxşı aparsanız..."

ABŞ-nin vitse-prezidenti Cey Di Vens “Fox News”a müsahibəsində bildirib ki, Donald Tramp Ukraynaya milyardlarla dollar hərbi yardım ayrılmasına mənfi yanaşır.

Onun sözlərinə görə, Ağ Ev lideri bu xərclərlə bağlı daha çox məsuliyyəti Avropa müttəfiqlərinin üzərinə qoymaq istəyir.

“Müharibəni dayandırmaq üçün yardım vacibdirsə, əlbəttə, biz dəstək ola bilərik. Amma əsas yük Avropanın üzərində olmalıdır. Bu, onların qitəsidir, onların təhlükəsizliyidir”, – Vens vurğulayıb.

O əlavə edib ki, Tramp heç vaxt heç nəyi tamamilə masadan qaldırmır, amma eyni zamanda heç nəyi tam olaraq masaya qoymur. Çünki o öz təsir imkanlarını əldən vermək istəmir: “Müharibəni dayandırmaq üçün nəyin zəruri olduğunu birlikdə müəyyənləşdirəcəyik”.

Vens müsahibəsi zamanı Zelenskinin ABŞ-yə son səfəri zamanı onunla buzları əritdiyini də qeyd edib: “Prezident Zelenski Oval kabinetə daxil olanda ona zarafatla dedim ki, özünüzü yaxşı aparsanız, heç nə deməyəcəyəm. O güldü və bu, aramızdakı buzları əritməyə kömək etdi”.