Tramp xüsusi nümayəndələrini İranla danışıqlara göndərməyəcək

ABŞ Prezidenti Donald Tramp Vaşinqton və Tehran arasında çox yaxşı danışıqlar aparıldığını bildirib.

Tramp bu barədə Ağ Evdə jurnalistlərə açıqlamasında deyib.

“Son 24 saatda yaxşı danışıqlar apardıq və razılığa gəlmək ehtimalı çox yüksəkdir”, – deyə Tramp bildirib.

ABŞ lideri əlavə edib ki, Vaşinqton istədiyini əldə etməlidir. “Əgər bu baş verməsə, böyük addım atmalı olacağıq”, – deyə o vurğulayıb.

Trampın sözlərinə görə, Tehran da razılaşma əldə etmək istəyir.

Ağ Ev lideri həmçinin İranın danışıqlar zamanı nüvə silahı əldə etmək səylərindən imtina etməyə razılaşdığını bildirib.

"İran nüvə silahına sahib ola bilməz və olmayacaq da. Digər şeylərlə yanaşı, onlar buna razılıq verib", – deyə Tramp əlavə edib.

O eyni zamanda xüsusi nümayəndəsi Stiv Uitkoff və kürəkəni Cared Kuşneri İranla danışıqlara göndərmək niyyətində olmadığını bəyan edib.

"Çətin ki, belə olsun. Düşünürəm ki, biz bunu buradan həll edə biləcəyik. Ola bilsin ki, yekun görüş üçün haradasa imzalanma mərasimi təşkil edək", – deyə o qeyd edərək müzakirələrin məsafədən aparılacağını vurğulayıb.