Trampa hücum edən şəxsin üzərindən nələr tapıldı? | Hadisənin dəhşətli təfərrüatı

ABŞ-nin Respublikaçılar partiyasının prezidentliyə namizədi Donald Trampa qarşı 3-cü sui-qəsdlə bağlı bəzi detallar məlum olub.

Belə ki, ölkənin Kaliforniya ştatında D.Trampın mitinqlərinin keçirildiyi məkanın yaxınlığında silahlı şəxs saxlanılıb.

Ölkə mediasının yaydığı məlumata görə, saxlanılan şəxs 49 yaşlı Las-Veqas sakini Vem Miller olub. Onun üzərindən içərisi dolu ov tüfəngi, saxta jurnalist vəsiqəsi və VİP keçid kartı tapılıb.

Qeyd edək ki, sui-qəsdə cəhd etməkdə ittiham olunan şəxsin saxta keçid vasitəsilə məkana daxil olmağa çalışdığı bildirilir. Şübhəli şəxs oktyabrın 12-də saxlanılıb. Lakin insident D.Trampın təhlükəsizliyinin təmin edilməsi məqsədilə keçirilən tədbirlərə təsir etməyib.

Sui-qəsd planı əvvəlcədən aşkarlanan şəxs təhlükəsizlik əməkdaşları tərəfindən həbs olunub. Daha sonra isə o, 5 min dollar girov qarşılığında sərbəst buraxılıb.

Xatırladaq ki, Donald Trampa qarşı ilk sui-qəsd cəhdi iyulun 13-də insanların gözü qarşısında baş verib. Növbəti sui-qəsd cəhdi isə sentyabr ayında Florida ştatında qolf meydançasında baş tutub. Lakin həmin hadisə də uğursuz olub.

Prezidentliyə namizəd Donald Tramp ona qarşı planlaşdırılan 3-cü sui-qəsd cəhdinə baxmayaraq, mübarizəsini davam etdirəcəyini açıqlayıb.