Trampdan gözlənilməz açıqlama: Müharibə davam edəcək

ABŞ Prezidenti Donald Tramp yaxın bir neçə gün ərzində rusiyalı həmkarı Vladimir Putinə zəng etməyə hazırlaşır.

Amerika lideri Ağ Evdə jurnalistlərə deyib ki, Ukrayna ətrafındakı vəziyyəti müzakirə etmək üçün Putinə zəng edəcək.

“Mən Vladimir Putinlə danışacağam. Onunla bu həftənin sonunda söhbətləşməyi planlaşdırıram”, – deyə Tramp söyləyib.

O, Ukraynada atəşkəs üçün Rusiya liderindən razılıq almağa ümid etdiyini bildirib:

“Necə deyərlər, tanqo üçün iki nəfər lazımdır, düzdür? Ona görə də ümid edirəm ki, o da razılaşacaq. Bu, doğrudan da düşünürəm ki, işin 75 faizi olacaq. Qalan məsələlər sənədlərin rəsmiləşdirilməsi, torpaqlar üzrə danışıqlar və digər məsələlərdir”.

Tramp əlavə edib ki, iki ölkənin nümayəndələri Ukrayna məsələsi üzrə görüşəcəklər.

“Əgər Vaşinqton Moskvanı atəşkəsə razılıq verməyə inandıra bilməsə, o zaman Ukraynada münaqişə davam edəcək”, – deyə Ağ Ev rəhbəri vurğulayıb.

O, Ukrayna Prezidenti Volodimir Zelenskini yenidən Ağ Evə dəvət edə biləcəyini də söyləyib.