Trampdan HƏMAS-a sərt xəbərdarlıq | "Əsirlərin cəsədləri qaytarılmasa, tədbir görüləcək"

ABŞ Prezidenti Donald Tramp bəyan edib ki, əgər Fələstin hərəkatı HƏMAS mümkün qədər tez İsrailə həlak olmuş girovların cəsədlərini qaytarmasa, ona qarşı tədbirlər görüləcək.

Bu barədə Amerika liderinin "X" sosial şəbəkəsindəki səhifəsində paylaşım edilib.

"HƏMAS mümkün qədər tez həlak olmuş girovların, o cümlədən iki amerikalının cəsədlərini qaytarmalı olacaq, əks halda bu böyük sülh prosesində iştirak edən digər ölkələr tədbirlər görəcək", − deyə D.Tramp yazıb.

O həmçinin əlavə edib ki, qarşıdakı 48 saat ərzində HƏMAS-ın fəaliyyətini çox diqqətlə izləyəcək.

"Asharq Al-Awsat" qəzeti mənbələrə istinadla yazıb ki, Qəzza ərazisində qalan girov cəsədlərinin tapılması üçün HƏMAS tərəfindən genişmiqyaslı axtarış əməliyyatı aparılmalıdır.

Nəşrin bildirdiyinə görə, axtarış prosesi çətinləşib, çünki cəsədlərin basdırıldığı yerlər barədə məlumata malik olan HƏMAS tərəfdarları hərbi əməliyyatlar nəticəsində həlak olublar.

Bundan başqa, cəsədlərin basdırıldığı ehtimal edilən bəzi anklav ərazilər İsrail Ordusu tərəfindən tamamilə dağıdılıb.