Trampdan İran və Venesuela ilə bağlı açıqlama

“ABŞ Venesuela ilə birbaşa dialoqa hazırdır”.

Bunu ABŞ lideri Donald Tramp Ağ Evdə Səudiyyə Ərəbistanı vəliəhdi və Baş nazir Məhəmməd bin Salman Al Saudla görüşdə deyib.

“Danışıqlara hazıram. Mən hamı ilə danışıram”, – deyən Tramp venesuelalı həmkarı Nikolas Maduro ilə danışıqların mümkünlüyü barədə suala cavab verərkən bildirib.

Bundan əlavə, Ağ Ev rəhbəri Venesuelanı ABŞ-yə məhbuslar və narkotik göndərməkdə ittiham edib, Vaşinqtonun isə qanunsuz miqrantları dərhal geri göndərdiyini vurğulayıb.

Karakasa ünvanlanan sərt tənqidlərə baxmayaraq, Tramp dialoqa açıq olduğunu söyləyib.

“CNN”in məlumatına görə, Nikolas Maduro bir neçə kanal vasitəsilə Donald Trampla əlaqə qurmağa çalışır. Noyabrın 18-də Tramp Venesuelaya qarşı bütün mümkün tədbirləri nəzərdən keçirdiyini, o cümlədən quru hərbi əməliyyatının aparılmasını istisna etmədiyini bildirib.

İranla münasibətlərdən də danışan Donald Tramp Tehranla mümkün sazişə açıq olduğunu deyib. O qeyd edib ki, tərəflər artıq bu mövzuda müzakirələrə başlayıb.