Trampdan Putinə Ukrayna ilə bağlı yeni ultimatum

“Biz artıq Rusiya rəhbərliyinin nüvə hədələrinə öyrəşmişik, lakin indi ABŞ Prezidenti onlara açıq reaksiya verib və iki atom sualtı qayığının “müvafiq rayonlarda” yerləşdirilməsi barədə göstəriş verdiyini açıqlayıb”.

Bunu britaniyalı analitik, Böyük Britaniya parlamentinin üzvü Bob Silli “The Telegraph” nəşrinə müsahibəsində bildirib.

Siyasətçinin fikrincə, Donald Trampın qəzəblənməsinə səbəb odur ki, Kremlin könlünü almağa yönələn siyasəti işə yaramayıb.

O xatırladıb ki, Rusiyada “eskalasiya naminə deeskalasiya” adlı doktrina fəal şəkildə müzakirə olunur. Bu yanaşmaya görə, nüvə silahından münaqişəni nəzarətə götürmək və düşməni kapitulyasiyaya məcbur etmək üçün istifadə oluna bilər.

B.Silli xəbərdarlıq edir ki, Vladimir Putinin nüvə silahı işlətmə ehtimalı böyük olmasa da, mümkünsüz deyil. Onun sözlərinə görə, gizli sənədlərə əsasən, ilk addım “nümayişkaranə zərbə” ola bilər, məsələn, su üzərində. Daha sonra quru ərazidə insanların olmadığı bir nöqtəyə zərbə. Üçüncü mərhələdə isə hərbi hədəfə, məsələn, logistika qovşağına zərbə endirilə bilər.

“V.Putin rejimi müharibəyə köklənib. Burada illüziyaya yer yoxdur. O, sülh istəmir”, – deyən siyasətçinin fikrincə, Qərb üçün ən yaxşı strategiya Ukraynanı dəstəkləmək, xüsusən də onun hava hücumundan müdafiəsini gücləndirməkdir ki, o, Rusiyanı döyüş meydanında saxlaya və bəlkə də, V.Putini müharibəni bitirməyə məcbur edə bilər.

Qeyd edək ki, V.Tramp Ukrayna müharibəsi ilə bağlı V.Putinə yeni ultimatum verdikdən sonra Dmitri Medvedev qəzəblənərək “bu, artıq Rusiya ilə Ukrayna arasında deyil, Rusiya ilə ABŞ arasında müharibəyə doğru bir addımdır” söyləyib.

Bu bəyanata cavab olaraq isə D.Tramp bildirib ki, ABŞ nüvə sualtı qayıqlarını işə salacaq.