Trampdan Qəzza ilə bağlı açıqlama | İsrail mənim şərtlərimi qəbul etdi

İsrail Ordusunun Qəzza zolağına hücumlarından sonra sentyabrın 7-də gün ərzində 46 nəfər həlak olub.

Bu barədə “Al Jazeera” telekanalı məlumat yayıb.

Bildirilib ki, onlardan 44 nəfəri Qəzza zolağının şimalında öldürülüb.

Qeyd edək ki, İsrail Ordusu Qəzzada HƏMAS tərəfindən istifadə olunan çoxmərtəbəli binalara hava zərbələri endirməyə davam edir.

Bu arada, ABŞ Prezidenti Donald Tramp şərtlərinin qəbul edilməsi ilə bağlı HƏMAS-a xəbərdarlıq edib. Ağ Ev rəhbəri HƏMAS hərəkatından Qəzza zolağında münaqişənin həlli ilə bağlı onun şərtlərini qəbul etməyi tələb edib və bunun son xəbərdarlıq olduğunu vurğulayıb. Tramp bu haqda öz “Truth” hesabında məlumat verib.

“Hər kəs girovların evlərinə getməsini, müharibənin bitməsini istəyir. İsraillilər mənim şərtlərimi qəbul etdilər, artıq HƏMAS-ın da onları qəbul etmək vaxtıdır. Mən HƏMAS-ı qəbul etməsələr, bunun nəticələri barədə xəbərdarlıq etmişəm. Bu, mənim son xəbərdarlığımdır və başqa heç nə olmayacaq”, ‒ deyə Tramp yazıb.

Məlumata görə, Tramp HƏMAS-a təklif edir ki, qalan 48 girovun hamısını azad etsin. Əvəzində atəşkəs, o cümlədən Qəzza şəhərinin ələ keçirilməsinə yönələn əməliyyat dayandırılacaq. Bundan sonra isə İsrail 2,5-3 min arası fələstinli məhbusu, o cümlədən israillilərin qətlinə görə ömürlük həbs cəzası çəkən yüzlərlə şəxsi azad edəcək.

Bundan əlavə, atəşkəs elan olunduqdan dərhal sonra müharibənin başa çatmasının şərtləri üzrə danışıqlara başlanması nəzərdə tutulur.