Trampdan Rusiyaya xəbərdarlıq | Bəli, mən bunu edəcəyəm

“ABŞ Rusiya ilə gərginliyin artacağı təqdirdə Polşa və Baltikyanı ölkələrə müdafiə yardımı göstərəcək”.

Bunu ABŞ lideri Donald Tramp Ağ Evin mətbuat xidmətinin əməkdaşları ilə görüşündə deyib.

“Bəli, mən bunu edəcəyəm”, ‒ deyə o, Rusiya ilə gərginliyin artacağı təqdirdə ABŞ-nin Baltikyanı ölkələr və Polşaya kömək edib-etməyəcəyi ilə bağlı suala cavabında deyib.

Qeyd edək ki, 2025-ci il sentyabrın 10-na keçən gecə Rusiyanın Ukraynanın qərbinə genişmiqyaslı hücumu zamanı bu ölkənin onlarla pilotsuz təyyarəsi Polşanın hava məkanını pozub. Hərbçilər pilotsuz təyyarələrin vurulduğunu, onların qalıqlarının sərhəd bölgələrində tapıldığını, lakin itkilərin olmadığını bildiriblər.

Polşanın Baş naziri Donald Tuskun sözlərinə görə, sentyabrın 9-dan 10-na keçən gecə ölkənin hava məkanında 19 pozuntu faktı qeydə alınıb. Hadisədən sonra NATO Polşanın xahişi ilə Alyans üzvləri arasında məsləhətləşmələrə başlamaq üçün Şimali Atlantika müqaviləsinin 4-cü maddəsini işə salıb.

Daha sonra, sentyabrın 19-da Rusiyanın üç təyyarəsi Estoniya sərhədini pozaraq ölkənin hava məkanında 12 dəqiqə qalıb. Qeyd olunan uçuşun Baltik dənizindəki Polşanın “Petrobaltic” neft platforması üzərindən həyata keçirildiyi bildirilir.