Trampın qalmaqallı qərarı qüvvəyə mindi | Qadağanın əsas səbəbi üzə çıxdı

Donald Trampın 12 ölkənin vətəndaşlarının ABŞ-yə səyahətini qadağan edən qərarı qüvvəyə minib.

Afrika və Yaxın Şərqdən olan 12 ölkənin vətəndaşlarını əhatə edən bu səyahət qadağası ABŞ-də miqrasiya ilə bağlı gərginliyin artdığı bir dövrdə tətbiq olunmağa başlanacaq.

Los-Ancelesdəki sərhəd etirazlarının 3-cü günündə D.Tramp milli təhlükəsizlik üçün təhdidləri əsas gətirərək səyahət qadağası qərarını icraya verib. Bildirilib ki, D.Tramp iyunun 5-də adıçəkilən qadağanı ehtiva edən bir sərəncam imzalayıb.

Sərəncama əsasən, Əfqanıstan, Myanma, Çad, Konqo Respublikası, Ekvator Qvineyası, Eritreya, Haiti, İran, Liviya, Somali, Sudan və Yəmən vətəndaşlarının ABŞ-yə səyahətinə qadağa qoyulub.

Bundan əlavə, D.Tramp Burundi, Kuba, Laos, Syerra-Leone, Toqo, Türkmənistan və Venesuela vətəndaşlarına da səyahət məhdudiyyətləri tətbiq edib.

Digər tərəfdən ABŞ-də qanuni şəkildə yaşayan və ya etibarlı vizası olan, həmçinin ABŞ-nin milli maraqlarına xidmət edən bu 19 ölkənin vətəndaşları sərəncamın əhatə dairəsinə daxil edilməyib.

Donald Tramp Ağ Evin "X" sosial media hesabında etdiyi paylaşımda bildirib:

"Bizə zərər vermək istəyən insanların ölkəmizə girməsinə icazə verməyəcəyik".

O həmçinin qeyd edib ki, səyahət məhdudiyyəti tətbiq edilən ölkələrin sayı zərurət yaranarsa, dəyişdirilə bilər və yeni təhdidlər ortaya çıxdıqca siyahıya başqa ölkələr də əlavə edilə bilər.