Trampın Qrenlandiya ilə bağlı məqsədi nədir?

ABŞ Konqresinin Nümayəndələr Palatasının üzvü Rendi Fayn Vaşinqtonun Qrenlandiyanı ilhaq etməsini nəzərdə tutan qanun layihəsini təqdim edib.

Bu barədə qurumun veb-saytında dərc olunmuş açıqlamada bildirilib.

Qanun layihəsinə əsasən, ABŞ Prezidenti Danimarka Krallığı ilə danışıqlar aparmaq, Qrenlandiyanı ilhaq etmək və ya başqa şəkildə onu ABŞ ərazisi kimi əldə etmək də daxil olmaqla zəruri tədbirlər görmək səlahiyyəti alır. Bundan sonra Qrenlandiyanın ABŞ-nin ştatı hesab ediləcəyi güman olunur.

R.Faynın sözlərinə görə, təşəbbüs ABŞ-nin Arktikadakı milli maraqlarını qorumaq, Çin və ya Rusiyadan artan təhdidlərə qarşı mübarizə aparmaq məqsədi daşıyır.

Ağ Ev öz növbəsində bildirib ki, ABŞ Prezidenti Donald Tramp Qrenlandiyanı Amerika ərazisi etməkdə maraqlıdır, çünki o, Rusiyanın və ya Çinin adaya iddia edə biləcəyindən ehtiyatlanır. Bu barədə isə Ağ Evin mətbuat katibi Kerolayn Levitt jurnalistlərə bildirib.

Onun sözlərinə görə, Tramp əvvəllər çalışıb ki, ABŞ Qrenlandiya üzərində nəzarəti ələ keçirsin, əks halda, ada sonda Çin və ya Rusiyanın təsiri altına düşə, hətta düşmənçilik yolu ilə ələ keçirilə bilər.

O əlavə edib ki, Qrenlandiyanın ABŞ tərəfindən mümkün ilhaqı təkcə Birləşmiş Ştatların deyil, həm də Qrenlandiyanın özünün maraqlarına xidmət edir.