Tükürpərdən ailə faciəsi | 7 doğmasını qətlə yetirən şəxs barədə dəhşətli detallar

İstanbulda baş verən dəhşətli qətllər şəhərdə böyük şok yaradıb. Üç saat ərzində bir-birinin ardınca həyata keçirilən silsilə qətllərdə 7 nəfər ölüb.

“Yeni Şafak” xəbər verir ki, qətllərin narkotik aludəçisi Bəxtiyar Aladağ tərəfindən törədildiyi ehtimal edilir.

Qətllərdən birincisi Bəxtiyar Aladağın Büyükçekmece gölü yaxınlığında gəzinti zamanı həyat yoldaşı Sevim Aladağ, 10 yaşlı oğlu Arsal Aladağ və qayınanası Türkan Soylunu başından güllələyərək öldürməsi ilə başlayıb. Məlum olub ki, saat 15:00-15:30 arasında törədilən bu qətllərdən sonra B.Aladağ valideynlərini qətlə yetirib.

Saat 16:00-16:30 arasında Büyükçekmece bölgəsində B.Aladağ anası Necmiye (55 yaş) və atası Muhammet Aladağı (65 yaş) başından atəş açaraq öldürüb. O, həmin vaxt evdə olan 30 yaşlı bacısı Buket Aladağa da ağır xəsarət yetirib.

Bəxtiyar Aladağ daha sonra Avcılar rayonunda baldızının işlədiyi bərbərxanaya gedib. Orada bərbər Mehmet Salih Özsökükə başından atəş açıb, qaynı Gökhan Soylunu ağır yaralayıb.

Bəxtiyar Aladağın qətl zənciri Esenyurta qədər uzanıb. Saat 18:00 radələrində əmisi Şadan Serdar Bükenin oğlunu Esenyurtda öldürüb. Yarım saat sonra o, başına atəş açaraq intihar edib. Ağır xəsarətlərlə xəstəxanaya yerləşdirilən bacısı Buketi xilas etmək mümkün olmayıb.

Polis B.Aladağın narkotik aludəçiliyinin və zorakılıq cinayətləri keçmişinin olduğunu bildirib. Hadisədən sonra aparılan araşdırmalar B.Aladağın psixi pozğunluq keçirib-keçirməməsinə yönəldilib. Psixiatrlar bu davranışın psixozdan qaynaqlana biləcəyini deyirlər.