“Türk Hava Yolları”nda nə baş verib? | Nyu-Yorka təcili eniş edildi

“Türk Hava Yolları”na məxsus təyyarənin pilotu Sietldən İstanbula uçuş zamanı anidən huşunu itirib. Nyu-Yorkda təcili eniş qərarı verilən hava gəmisinin kapitan pilotunun həyatını xilas etmək mümkün olmayıb.

Hadisə ilə bağlı qurumun müşaviri Yəhya Üstün açıqlama verib.

“Sietl-İstanbul reysini həyata keçirən “Eyrbas 350” tipli təyyarəmizin kapitan pilotu İlçehin Pehlivan uçuş zamanı huşunu itirib. Təyyarədə kapitanımıza edilən ilkin tibbi müdaxilə nəticəsiz qaldığı üçün uçuş heyəti təcili eniş etmək qərarına gəlib. Lakin kapitan yerə enmədən artıq həyatını itirib”, – deyə o, sosial şəbəkə hesabında yazıb.

Məlumat üçün bildirək ki, 2007-ci ildən bəri “Türk Hava Yolları”nda çalışan İ.Pehlivanın 59 yaşı var idi. Uçuşdan öncə sağlamlıq müayinəsi zamanı onun səhhətində hər hansı problem aşkar edilməyib.