Elçin İbadov və Şekib Avdagiç bir araya gəldi | Mühüm müzakirələr aparıldı

“SOCAR Türkiyə” şirkəti İstanbul Ticarət Palatası və Türk Hava Yolları ilə SAF texnologiyası və istehsalı, eləcə də yeni investisiya imkanlarını müzakirə edib.

Bu barədə “Report” “SOCAR Türkiyə”yə istinadən xəbər verib.

Məlumata görə, “SOCAR Türkiyə” şirkətinin baş icraçı direktoru Elçin İbadov İstanbul Ticarət Palatasının prezidenti Şekib Avdagiç ilə görüşüb. Görüşdə Türk Hava Yollarının baş direktor müavini Levent Konukçu da iştirak edib.

Hazırda “SOCAR Türkiyə Enerji” STAR neft emalı zavodunda SAF yanacağının istehsalı imkanlarını araşdırır. Layihə texniki qiymətləndirmə mərhələsindədir.

Məlumat üçün deyək ki, SAF “Jet-A1” aviasiya yanacağının ekoloji təmiz versiyasıdır. Adi aviasiya yanacağından fərqli olaraq SAF karbon emissiyalarını 80 % azaldır.

Xatırladaq ki, 2006-cı ilin sonlarında təsis edilən “SOCAR Türkiyə” Türkiyədə neft emalı, neft-kimya və təbii qaz ticarəti sahələrində fəaliyyət göstərir.

Şirkət “Petkim Petrokimya Holding”in 51 %-lik səhmlərinə nəzarət edir, STAR neft emalı zavodu, konteyner terminalı və elektrik stansiyası tikib, həmçinin daxili bazara qaz tədarükü və Türkiyənin bir sıra iri şəhərlərindəki hava limanlarında təyyarələrin yanacaqdoldurma məntəqələrinə yanacaq tədarükü ilə məşğuldur.