Türkiyə gəmisi hücuma məruz qaldı | Anbaan görüntülər - Baku TV

Ukraynanın Odessa limanında Rusiya Ordusu tərəfindən raketlə vurulduğu bildirilən Türkiyəyə aid yük gəmisində yanğın baş verib.

Yanan gəminin videogörüntüləri yerli media tərəfindən paylaşılıb. Ukraynanın Odessa limanı istiqamətində hərəkətdə olan, mərkəzi Türkiyədə olan “Cenk Ro-Ro” şirkətinə aid Panama bayrağı altında üzən “CENK T” adlı sərnişin və yük daşıyan gəminin “İskəndər” raketi ilə vurulduğu bildirilir.

Hadisə gəminin Çernomorsk limanına yanaşmasından sonra, yerli vaxtla saat 16:00 radələrində baş verib. Raket zərbəsi nəticəsində gəminin göyərtəsində yanğın başlayıb. Lakin limanın yanğın xidməti və ekipajın operativ müdaxiləsi ilə alov nəzarətə götürülüb.

Hadisə zamanı insan tələfatı qeydə alınmayıb. Gəmiyə maddi ziyan dəyib. Hücum zamanı Azərbaycan qeydiyyatı olan 10-dək avtomobildaşıyan texnikanın da hədəfə alındığı ehtimal olunur.

Şirkət hadisə ilə bağlı araşdırmanın davam etdiyini və rəsmi qurumlarla tam əməkdaşlıq etdiklərini açıqlayıb.