Türkiyə üçün böyük risk | Suriya müxalifəti necə bu qədər gücləndi?

“Suriyada beynəlxalq konfiqurasiyanın dəyişməsi, xüsusilə Rusiya-Ukrayna müharibəsi, İsrailin İrana vurduğu ziyanlar və İranın Suriyadakı uzantılarının təsirsiz hala gətirilməsi sayəsində Suriya müxalifəti hərəkətə keçdi və bəzi bölgələr uğurla ələ keçirildi.

Suriya müxalifəti dediyimiz təxminən on qrupa bölünür. Bu qruplardan ən təsirliləri “Heyət Təhrir əş-Şam” və Suriya Milli Ordusudur. Həyata keçirilən hücumlar nəticəsində Hələb, Tel-Rifat, Həma (yaxın günlərdə böyük ehtimalla Xüms də bura daxil olacaq) bölgələrində nəzarət yenidən Suriya müxalifətinin əlinə keçib. Təxminən 9 ildir ki, bu ərazilər Əsəd rejimi və PKK/YPG-nin nəzarətində idi”.

Bu sözləri “Axar.az”a Türkiyənin ölkəmizdəki keçmiş hərbi attaşesi, general Yücel Karauz Suriyada hadisələrin necə inkişaf edəcəyini şərh edərkən deyib.

Onun sözlərinə görə, bölgədə qeyri-sabit vəziyyətin hələ bir müddət qalma ehtimalı narahatlıq yaradır:

“Bu, qısamüddətli dövrdə sevindirici görünsə də, orta və uzunmüddətli perspektivdə bölgədə qeyri-sabitliyi artıracaq. Çünki hər müharibədən və mübarizədən sonra bir qənimət paylaşımı prosesi olur və bu dövrdə ciddi problemlər yarana bilər. Çünki bu qruplardan HTŞ həm ABŞ, həm Avropa, həm də Türkiyənin terror siyahısındadır. Bu vəziyyətə gəlinməsinin əsas səbəblərindən biri Astana prosesinin düzgün işləməməsidir. Bu çərçivədə İran, Rusiya və Türkiyənin xarici işlər nazirlərinin bir araya gəlməsi bir qədər gecikmiş təsir metodudur.

Bunun çox fayda gətirəcəyini düşünmürəm. Bu bölgə köç və yeni münaqişələri ilə birlikdə yenidən risk və təhdidlər daşıyır. Bu səbəbdən Türkiyə üçün Suriyanın bütövlüyü vacibdir”.