Türkiyə və ABŞ-nin maraqları üst-üstə düşür?

"Türkiyə Cənubi Qafqazda çox mühüm rol oynayır. ABŞ buna qarşı deyil və Türkiyəni regionda mühüm müttəfiq hesab edir".

Bunu "NEWS.am"a açıqlamasında amerikalı politoloq, ABŞ-nin keçmiş prezidenti Corc Buşun Rusiya və Avrasiya üzrə köməkçisi Tomas Qrem deyib.

Onun sözlərinə görə, Cənubi Qafqaz məsələsi, Mərkəzi Asiya məsələsindən qat-qat mürəkkəbdir, çünki ABŞ-nin Cənubi Qafqazda birbaşa maraqları var və buna görə də orada fəal rol oynamaq niyyətindədir:

"Mən ABŞ-nin bu məsələdə tamamilə Türkiyəyə güvənəcəyini düşünmürəm, lakin yaxın müzakirələr mütləq ən azından Tramp dövründə davam edəcək".

O əlavə edib ki, Vaşinqton Türkiyənin Mərkəzi Asiyada da fəal rol oynamasının əleyhinə deyil.

"ABŞ-nin rəqibləri olan Rusiya və Çin hazırda orada mühüm rol oynayır. Ona görə də Türkiyənin bu regiondakı fəaliyyəti əsasən ABŞ-nin maraqları ilə üst-üstə düşür. Orta Asiyada yüksək texnologiyaların inkişafı üçün zəruri olan nəhəng mineral ehtiyatları var, ona görə də bütün böyük dövlətlərin regiona marağı artır. Bu regionda geosiyasi rəqabətin güclənməsini proqnozlaşdırmaq olar", – amerikalı politoloq bildirib.