Türkiyə və İran prezidentlərinin telefon danışığında maraqlı nüans

Türkiyə Prezidenti Rəcəb Tayyib Ərdoğanla İranın yeni Prezidenti Məsud Pezeşkian arasında baş tutan telefon danışığında hansı dildən istifadə edildiyi barədə məlumat yayılıb.

Bu barədə şərhçi və jurnalist Azər Məhdəvan özünün “X” hesabında yazıb.

O, Məsud Pezeşkianın təklifi ilə prezidentlərin tərcüməçi vasitəsilə danışdıqlarını bildirib.

“R.T.Ərdoğan telefon danışığı zamanı M.Pezeşkiandan soruşub ki, bundan sonra farsca, yoxsa türkcə danışaq? M.Pezeşkian isə cavabında bildirib ki, Azərbaycan türkcəsi anlayışları qarşılıqlı başa düşməkdə çətinlik yarada bilər, farsca danışmaq daha yaxşıdır. Onlar tərcüməçi vasitəsilə fars dilində danışıblar”, – A.Məhdəvan yazıb.

Qeyd edək ki, Azərbaycan Prezidenti İlham Əliyev və Məsud Pezeşkianın telefon əlaqəsi zamanı hansı dildə danışdıqları barədə sosial mediada suallar səsləndirilsə də, heç bir tərəfdən buna cavab verilməyib.