Türkiyədə "tiktoker"lərə qarşı böyük əməliyyat
Türkiyədə Kibercinayətkarlıqla Mübarizə İdarəsinin əməkdaşları aralarında sosial media fenomenlərinin və blogerlərin də olduğu 120 nəfəri saxlayıb.
Əməliyyat zamanı saxlanılan şəxslər çirkli pulların yuyulmasında şübhəli bilinirlər. Türkiyə mətbuatında yayımlanan məlumata görə, cinayətkar dəstə oğurlanmış kredit kartları ilə fırıldaqçılıqla məşğul olub. Bu qrupun “TikTok” fenomenləri ilə əməkdaşlıq etdiyi də məlum olub.
Dəstə üzvləri oğurlanmış kredit kartları ilə jeton alıb və bunları fenomenlərə göndərib. Bu üsulla blogerlərə yüksək məbləğdə pulun göndərildiyi aydın olub. Daha sonra isə dəstə üzvləri bu məbləğin böyük hissəsini fenomenlərdən geri alaraq onlara komissiya ödəyib.
Ümumilikdə, cinayətkar dəstənin sosial media fenomenlərinə 1 milyard 200 milyon lirə, təxminən 86 milyon 400 min Azərbaycan manatı göndərdiyi qeyd olunub. Polis əməliyyat nəticəsində 42 fenomenin əmlakını müsadirə edib.
Qeyd edək ki, saxlanılanlar arasında azərbaycanlı bloger Səfər Eyvazovun da olduğu iddia olunur. “TikTok” sosial şəbəkəsində 726 000, “İnstagram”da isə 1 milyondan çox izləyicisi olan bloger son paylaşımını bir gün öncə edib. Səfər uzun zamandır ki, müxtəlif məzmunlarda hazırladığı videolarını İstanbuldan paylaşıb və hər gün canlı yayımlar açaraq hədiyyələr qazanıb. Şərhlərdə izləyiciləri Səfər Eyvazovun saxlanılması ilə bağlı müxtəlif rəylər yazıblar, onun polis bölməsinə birbaşa qaldığı hoteldən aparıldığını iddia ediblər.
![icon](/images/loading.png)