Türkiyədə saxlanılan 51 nəfər nədə şübhəli bilinir?

İŞİD terror təşkilatına qarşı keçirilən əməliyyatlarda 51 şübhəli saxlanılıb.

Bu barədə Türkiyənin daxili işlər naziri Ali Yerlikaya məlumat verib.

Bildirilib ki, İŞİD üzvü olan, təşkilatla əlaqəli yardım qurumlarına maliyyə ayıran və sosial media hesabları üzərindən terror təşkilatının təbliğatını aparan 51 şübhəli saxlanılıb.

Türkiyənin 32 vilayətində jandarma tərəfindən son iki həftə ərzində həyata keçirilən əməliyyatlar zamanı çox sayda təşkilata aid sənəd və rəqəmsal materialın ələ keçirildiyini bildirən Yerlikaya qeyd edib:

“Valilərimizi, respublika baş prokurorlarımızı, Terrorla Mübarizə İdarəsi, vilayət jandarma komandanlarımızı və qüvvələrimizi təbrik edirəm. Terrorla mübarizəmiz yalnız hüquq-mühafizə orqanlarımızın bu sahədəki əməliyyatları ilə məhdudlaşmayan, təhlükəsizlik, kəşfiyyat, kommunikasiya və beynəlxalq əməkdaşlığı əhatə edən çoxşaxəli bir dövlət refleksinə əsaslanır”.

Nazir Yerlikaya Türkiyənin hər bölgəsində əmin-amanlq və sabitliyi təmin etmək üçün ilin 365 günü, gecə-gündüz həyata keçirilən əməliyyatların fasiləsiz davam etdiyini vurğulayıb.