Türkiyənin 30 bölgəsində İŞİD-ə qarşı əməliyyat keçirildi | Anbaan görüntülər

Türkiyənin 30 bölgəsində İŞİD-ə qarşı əməliyyatlar keçirilib. Bu barədə Türkiyə mediası məlumat yayıb.

Bildirilib ki, “Bozdoğan 17” əməliyyatları zamanı 147 şübhəli şəxs saxlanılıb. Bundan başqa, təkcə İstanbulda keçirilən əməliyyatda 17 İŞİD üzvü ələ keçirilib.

Şəhərdə Respublika Prokurorluğunun Terror və Mütəşəkkil Cinayətlər üzrə İstintaq Bürosu tərəfindən aparılan araşdırmada 27 nəfərin İŞİD-ə bağlı fəaliyyət göstərdiyi müəyyən edilib. Digər şübhəlilərin tutulması üçün axtarışlar davam edir.

Ölkənin daxili işlər naziri Ali Yerlikayanın sözlərinə görə, 2023-cü il iyunun 1-dən 2024-cü il martın 25-dək olan müddətdə İŞİD-ə qarşı 1329 əməliyyat keçirilib, nəticədə 2919 nəfər saxlanılıb.