Türkiyənin sərt mövqeyi ABŞ və İsrailin "kürd planı"nı iflasa uğratdı - Baku TV

İsrail və ABŞ-nin İrana qarşı hazırladığı, on minlərlə kürd döyüşçünün iştirakı ilə Tehrana qədər irəliləməyi nəzərdə tutan gizli hərbi planın Türkiyənin sərt müqaviməti nəticəsində iflasa uğradığı məlum olub.

İsrailin "12-ci kanal"ının yaydığı şok məlumata görə, müharibənin erkən mərhələsində müxtəlif kürd partiyalarından olan on minlərlə silahlı döyüşçü İraq sərhədini keçərək İrana daxil olmalı, yerli əhalini silahlandırmalı və ölkə daxilində silsilə üsyanlar başlatmalı idi. Lakin bu "yerüstü əməliyyat" fazası bir neçə mühüm səbəbdən reallaşmayıb.

Məlumata görə, planın beynəlxalq mediaya sızması Tehranın vaxtında tədbir görməsinə şərait yaradıb, lakin ən həlledici amil rəsmi Ankaranın Vaşinqtona göstərdiyi kəskin təzyiq olub.

Türkiyə Prezidenti Rəcəb Tayyib Ərdoğan ABŞ rəhbərliyinə açıq şəkildə bildirib ki, Türkiyə regionda hər hansı bir kürd dövlət qurumunun formalaşmasına və ya kürd silahlılarının bu dərəcədə güclənməsinə əsla icazə verməyəcək. Ankaranın bu qətiyyətli mövqeyi qarşısında Vaşinqton planı dondurmaq məcburiyyətində qalıb.

İsrail telekanalı qeyd edir ki, "Mossad"ın bu ssenarisinə böyük ümid bəsləyən Baş nazir Benyamin Netanyahu "silsilə sürprizlər" vədinin yerinə yetirilməməsinə görə dərin məyusluq yaşayır.

Hazırda Tehran Türkiyənin bu gedişindən yararlanaraq İraqın şimalındakı kürd qruplaşmalarına qarşı hərbi təzyiqi artırıb və Bağdadla diplomatik təmaslarını intensivləşdirib.