Türkiyəyə gedən rusiyalı diplomat hoteldə ölü tapıldı

Rusiyalı diplomat 61 yaşlı Nikolay Kobrines Türkiyənin İstanbul şəhərinin Taksim rayonunda yerləşən hoteldə ölü tapılıb.

Bu barədə Türkiyə mətbuatı məlumat yayıb.

Əvvəllər Rusiya Xarici İşlər Nazirliyinin baş direktoru vəzifəsində çalışan diplomat səfirlərin görüşünə qatılmaq üçün İstanbulda yerləşən dəbdəbəli hotellərdən birinə gəlib.

Nikolay Kobrines günorta saatlarında hoteldəki otağına yerləşib və ertəsi gün görüşə gəlməyib. Diplomatla əlaqə saxlamaq mümkün olmadığından həmkarları hoteldən onunla bağlı məlumat verilməsini istəyiblər.

Otağa daxil olan hotel işçiləri rusiyalı diplomatı çarpayıda hərəkətsiz şəkildə uzanmış vəziyyətdə görüblər. Hadisə yerinə gələn tibb qrupları onun ölümünü təsdiqləyiblər.

Məhkəmə-tibb eksperti, prokuror və istintaq qrupunun ilkin məlumatına görə, Nikolay Kobrines ürək tutmasından vəfat edib. Müayinədən sonra diplomatın cəsədi ölüm səbəbinin dəqiq müəyyən edilməsi üçün Ədliyyə Tibb İnstitutunun meyitxanasına aparılıb.

Faktla bağlı istintaq davam edir.